SEE नतिजा खस्किएपछि जानकी माविको नयाँ योजना: अंग्रेजी माध्यमका लागि छुट्टै ब्लक, कक्षागत शुल्क विवरण सार्वजनिक
कपिलवस्तु टाइम्स
७ दिन अगाडि
कपिलवस्तु, महाराजगन्ज । महाराजगन्ज नगरपालिकाको मुटुमा स्थापित ऐतिहासिक शैक्षिक संस्था श्री जानकी माध्यमिक विद्यालयको यस वर्षको एसईई (SEE) नतिजा निराशाजनक आएपछि विद्यालयले शैक्षिक गुणस्तर सुधारका लागि नयाँ व्यवस्थापकीय रणनीति सार्वजनिक गरेको छ।
हालै सार्वजनिक साधारण तर्फको नतिजा अनुसार परीक्षामा सम्मिलित कुल ११७ जना विद्यार्थीमध्ये मात्र ७ जना उत्तीर्ण भएपछि विद्यालयको पठनपाठनको स्तरमाथि गम्भीर प्रश्न उठेको थियो। यसै परीक्षा फललाई मध्यनजर गर्दै विद्यालय प्रशासन र व्यवस्थापन समितिले अंग्रेजी माध्यमलाई थप व्यवस्थित र परिमार्जित गर्ने निर्णय गरेको हो।
नेपाली माध्यमको शुल्क यथावत्, अंग्रेजी माध्यमलाई छुट्टै ब्लक र नयाँ शुल्क
पहिलेदेखि नै सञ्चालनमा रहेको अंग्रेजी माध्यमको शैक्षिक वातावरण चुस्त बनाउन विद्यालयले अब यसलाई छुट्टै ‘ब्लक’ (भवन) मा स्थानान्तरण गरेको छ। विद्यालयका अनुसार नेपाली माध्यममा अध्ययनरत विद्यार्थीहरूका लागि पुरानो सहयोग शुल्कलाई यथावत् राखिएको छ भने अंग्रेजी माध्यमका लागि बालविकास (ECD) देखि कक्षा ५ सम्म पूर्ण रूपमा निःशुल्क गरिएको छ।
तर, माध्यमिक तहको गुणस्तर सुधार्न र आवश्यक स्रोत साधन जुटाउन कक्षा ६ देखि १० सम्मका विद्यार्थीहरूका लागि वैज्ञानिक शुल्क प्रणाली लागू गरिएको छ। विद्यालय प्रशासनले सार्वजनिक गरेको मासिक शुल्क विवरण यस प्रकार छ:
कक्षा ६: मासिक रु. २००/-
कक्षा ७: मासिक रु. २५०/-
कक्षा ८: मासिक रु. ३००/-
कक्षा ९: मासिक रु. ३५०/-
कक्षा १०: मासिक रु. ४००/-
स्थानीयमा आशंका र सुधारको आशा
विगतमा न्यून शुल्कमा पढाइँदै आएको अंग्रेजी माध्यमलाई अहिले छुट्टै ब्लक र नयाँ शुल्क ढाँचामा लैजाँदा स्थानीय स्तरमा दुईपक्षीय बहस सुरु भएको छ। पढाउने शिक्षकहरू पुराना र तिनै हुन् भने भौतिक ब्लक परिवर्तन गर्दैमा र शुल्क बढाउँदैमा मात्र नतिजा कसरी सुधार हुन्छ भन्ने आशंका केही अभिभावकहरूको छ।
यद्यपि, छुट्टै ब्लकको व्यवस्थापनले विद्यार्थीहरूलाई शान्त र अनुशासित अंग्रेजी वातावरण मिल्ने तथा संकलित शुल्कबाट अतिरिक्त कोचिङ कक्षा, विशेष निगरानी र आधुनिक शैक्षिक सामग्रीको व्यवस्थापन गर्न सकिने हुनाले अब कक्षा ६ देखि १० सम्मका भाइबहिनीहरूको गुणस्तरमा अवश्य सुधार आउने अपेक्षा र आशा पनि उत्तिकै गरिएको छ।
नतिजा सुधार्ने विद्यालयको यो नयाँ प्रयास कत्तिकै फलदायी हुन्छ भन्ने कुरा आगामी परीक्षाको परिणामले देखाउनेछ। तर, यस ऐतिहासिक विद्यालयको साख जोगाउन र विद्यार्थीको भविष्य उज्यालो बनाउन स्थानीय जनप्रतिनिधि, शिक्षाप्रेमी र अभिभावकहरूले पनि निरन्तर निगरानी र सकारात्मक खबरदारी गर्नुपर्ने आवश्यकता देखिएको छ।