काठमाडौं । परिवार दलका अध्यक्ष एकनाथ ढकाल प्रायः विदेशतिरै घुमिरहेका हुन्छन् ।

एक वर्षमा उनी आधा समय विदेशमै बिताउँछन् । राजनीतिमा छोटो समयमा छलाङ मारेका ढकाल क्रिश्चियन धर्म प्रचारक हुन् ।

यद्यपि मूलधारका क्रिश्चियन होइनन् । आफूलाई वास्तविक क्रिश्चियन दाबी गर्दै कोरियाली धर्मगुरु सन म्योङ मुनले स्थापना गरेको युनिफिकेसन चर्चमा उनी आवद्ध छन् ।

यस चर्चको नेपाल च्याप्टरलाई युनिभर्सल पिस फेडरेसन (यूपीएफ) नाममा सञ्चालन गरिएको छ । सामाजिक संस्थाको खोल ओढेर यसले धार्मिक गतिविधि गर्दै आएको छ । ढकाललाई एमालेले समानुपातिक सांसद बनाएको हो ।

उनको एमाले अध्यक्ष केपी ओलीसँग धेरै राम्रो सम्बन्ध छ । शक्तिकेन्द्र रिझाएर शक्तिशाली बन्ने चरित्रका ढकाल दुई दुईपटक सभासद् र मन्त्री बनिसकेका छन् । यतिबेला उनी ओलीसँगै कम्बोडिया पुगेका छन् ।

एमाले अध्यक्ष ओलीको नेतृत्वमा एक उच्चस्तरीय टोली निर्वाचनको पर्यवेक्षण गर्न कम्बोडिया गएको हो । ओलीको टोलीमा श्रीमती राधिका शाक्य, उपमहासचिव विष्णु पौडेल र राजन भट्टराई छन् ।

तर ढकाल पनि ओलीसँगै रहेको तस्बिर सार्वजनिक भएको छ । जुन तस्बिर ओलीको निजी सचिवालयले सार्वजनिक गरेको हो ।