कपिलवस्तु ।।

फागुन १२ गते

कपिलवस्तुको विजयनगर गाउँपालिकामा शुरु भएको चौथो गौरीघाट लोक साँस्कृतिक, पर्यटन तथा खेलकूद मेला अन्तर्गत आज भलिबल खेल अन्र्तगतको क्वाटरफाइनल खेलमा ८ टिमबिच प्रतिस्पर्धा भएको छ ।
आज भएको भलिबल खेल अन्तर्गतको पहिलो खेलमा विजयनगर १ नयाँगाउँ र सुनौलो बिहानी युवा क्लब भुपु बिच भएको थियो । जस अन्तर्गत विजयनगर १ नयाँगाउँले सुनौलो बिहानी युवा क्लब भुपुलाई सोझो सेटमा हराएको छ ।

निस्दी गाउँपालिका पाल्पा र प्रगतिशिल युवा क्लब अर्घाखाचि बिच भएको दोस्रो खेलमा भने निस्दी गाउँपालिका पाल्पाले जित निकालेको हो । यस्तै
एपी.एफ. पाँच नम्बर बाहिनी चन्द्रौटा बिच बाडगङ्गा हाईयर सेकेन्डरी स्कुलसंग भएको तेस्रो खेलमा एपी.एफ. पाँच नम्बर बाहिनी चन्द्रौटाले बाडगङ्गा हाईयर सेकेन्डरी स्कुललाई सोझो सेटमा पराजित गरेको छ ।

आजको अन्तिम तथा सेमिफाइनलको पहिलो खेल ब्रेभ गोर्खा बुटवल क्लब र एपी.एफ. पाँच नम्बर बाहिनी चन्द्रौटा बिच भएको थियो भने खेलमा ब्रेभ गोर्खा बुटवल क्लबले ३–२ को सेटमा एपी.एफ. पाँच नम्बर बाहिनी चन्द्रौटालाई हराउदै फाइनलको यात्रा सुनिश्चित गरेको हो ।
भोली पनि ४ खेल हुने आयोजकले जानकारी दिएको छ ।

भोली हुने सेमिफाइनलको पहिलो खेल शारु इलेक्ट्रोनिक प्रेमनगर बिच निस्दी गाउँपालिका पाल्पा खेल्ने भएको छ । यस्तै प्रतियोगिताको फाइनल खेल पनि भोलि नै हुने आयोजकले जनाएको छ ।

प्रतियोगितामा प्रथम हुने टिमले रु.३० हजार, दोस्रोले रु. २० हजार र तेस्रो हुनेले रु. १० हजार नगद सहित ट्रफी, मेडल र प्रमाणपत्र प्रदान गरिने गौरीघाट लोक साँस्कृतिक, पर्यटन तथा खेलकूद मेलाका आयोजक थर्क बहादुर खन्गाहाले जानकारी दिनु भएको छ ।

भोली १३ गते मंगलवार साँस्कृतिक कार्यक्रमको समउद्घाटन भई १५ गते विहिवारसम्म मेला लाग्ने जनाएको छ । मेलामा राष्ट्रिय तथा स्थानिय कलाकारको बेजोड प्रस्तुति रहने आयोजकले जनाएको छ । मेलामा आर्कषकको रुपमा चर्चित गायिका सम्झना लामिछाने, गायक सन्दीप न्यौपाने, विक्रम राना, दिपक करौँझा, दिपक भण्डारी तथा स्थानिय कलाकारहरुको बेजोड प्रस्तुति रहनेछ ।

भोलीको साँस्कृतिक कार्यक्रममा राष्ट्रिय लोक दोहरी गायक सन्दीप न्यौपानेको प्रस्तुति रहने आयोजकले जनाएको छ