गुल्मी : गुल्मीका स्थानीय तहमा खरिद‚ निर्माणलगायत विषयका ५७ वटा उजुरी अख्तियार दुरुपयोग अनुसन्धान आयोगमा परेका छन्। अख्तियार दुरुपयोग अनुसन्धान आयोग कार्यालय बुटवलका सूचना अधिकारी रामकृष्ण अधिकारीका अनुसार यस आर्थिक वर्षको शुरुदेखि पुस मसान्तसम्म गुल्मीका ५७ वटा उजुरी परेका छन्।

अधिकारीका अनुसार स्थानीय तहसँग सम्बन्धित २४ उजुरी परेका छन् भने अन्य उजुरी संघ र प्रदेशसँग सम्बन्धित छन्। स्थानीय तहसँग सम्बन्धित उजुरीहरुमा सार्वजनिक खरिद, सडक निर्माण र अन्यमा विद्यालय भवन निर्माण, दिवा खाजालगायत विषय रहेको कार्यालयले जनाएको छ।

कार्यालयमा परेका ५७ वटा उजुरीमध्ये १२ वटा उजुरीको किनारा लागिसकेको छ भने ४५ वटा उजुरीबारे अध्ययन भइरहेको कार्यालयले जनाएको छ।